எண் மாறாமல் ஃபோன் நிறுவனம் மாறும் வசதி: நாடு முழுவதும் 3ம் தேதி அமலாகிறது

செல்ஃபோன் எண்ணை மாற்றாமல், சேவை தரும் நிறுவனத்தை மாற்றிக் கொள்ளும் வசதி நாடு முழுவதும் நாளை மறுநாள் விரிவுபடுத்தப்பட உள்ளது. இதை டெல்லியில் தொலைத் தொடர்புத் துறை அதிகாரிகள் தெரிவித்தனர்.

ஒரே தொலைத் தொடர்பு வட்டத்துக்குள் செல்ஃபோன் எண் மாறாமல் நிறுவனம் மாறும் வசதி இப்போது நடைமுறையில் உள்ளது. இதை மாநிலம் விட்டு மாநிலம் சென்றாலும் பெறும் வகையில் புதிய வசதி ஏற்படுத்தப்படுகிறது.

இதன்படி, 3ம் தேதி முதல் கன்னியாக்குமரியில் இருந்து ஒருவர் காஷ்மீருக்குச் சென்றாலும் தனது செல்ஃபோன் எண்ணை மாற்றாமல் சேவை தரும் நிறுவனத்தை மாற்றிக் கொள்ள முடியும்.இந்த வசதியை கடந்த மே மாதம் 3ம் தேதியே அமல்படுத்த அரசு திட்டமிருந்த நிலையில், தொலைபேசி நிறுவனங்கள் சங்கத்தின் சார்பில் கூடுதல் அவகாசம் கேட்கப்பட்டது. இதையடுத்து, அவகாசம் 2 மாதங்கள் நீட்டிக்கப்பட்டிருந்தது.